لازمنا صحيح …اما حتى انت لازمك … ثمّة فئة محسوبة على جمهور النادي الصفاقسي ..واصبحت اعرفهم بالاسماء ..تدويناتهم دائما من نوع _ يلزمنا _ وطبعا تختلف و تتنوّع مطالبهم .. في نوع الملاعبية في نوع المسؤولين في نوع الممرنين … تقولشي عليهم اوّلا باش عرّفين في الكورة .. ثمّ عمرهم لا اتفقوا على رأي واحد .. جماعة تطلّع وجماعة تهبّط ..ووقت ما يلقاو على شكون يدورو يدورو على ارواحهم ..هوايتهم المفضّلة وهوما بارعين فيها هي _ يلزمنا _ واااصحّ يلزمكم وهوما يتوجهو بكلامهم للمسؤولين او الممرن او اللاعبين … منطقي انو ايّ محبّ يتمنى آلاف الامنيات لجمعيتو ..ومنطقي ايّ محبّ يبدي رايو في ايّ موضوع يهمّ النادي ..ولكن المنطقي اكثر انك تعرف احوال النادي وامكانياتو .. ووقتها تولّي تبعد عن شهواتك غير المعقولة .. من وجهة نظري انو النادي في هذي المرحلة في حاجة الى تمويلات وتمويلات وتمويلات ..وفي حاجة الى جماهير تكتب باحترام ..لانّو ايّ محبّ ينوي الترشّح لهيئة مديرة ويشوف كمّية قلّة الحياء متاع البعض من جماهير النادي يجبد روحو .._اش لزّني حتى الواد يهزّني _ ثمّ موش شيء يضّحك ثمّ يبكّي وقت تشوف عدد المشاركين في السوسيوس في ولاية المليون ساكن بضعة آلاف ؟؟… واذا ثمة شكون لعب بفلوس المساهمين في السوسيوس افضحوه اولا وقدموه للقضاء ثانيا …ثمّ قداش من واحد عندو ابونمون ؟؟ ثمّ قداش من واحد ما عادش يتذكّر وقتاش قصّ تسكرة ومشى يتفرّج في ناديه … يلزمنا برشة حاجات تتصلّح في السي اس اس اما انت كمحبّ زادة يلزمك تعرف واجباتك المادية والادبية تجاه ناديك ..وبما انو نحكيو على شنوة لازمنا .. انا نتصوّر انّو اوّل حاجة في المرحلة هذيّة يلزمنا نتفطّنو ليها انو مازلنا بعاد على الاقاب وانو امام الوضع المادّي المتردّي للنادي يلزمنا نحافظو على وجود النادي … نعم حالتنا لكلّ هذه الاسباب تدعونا جميعا للتفكير بجدّية وبعيدا عن العنطزة الفيسبوكية لتوفير اسباب مواصلة النادي في الوجود …عمري ما كنت متشائم وعمري لا نتصوّر الغالية تمرّ بمثل هذه المرحلة الصعبة جدا ..اما لانّي نموت على السي اس اس يلزمني عقلي ما يغيبش … اخيرا مرحبا بالممرن نبيل الكوكي اللي ثمة شبه اجماع علىك وربي يعينك على الشانطي الكبير اللي انت مقبل عليه واذا عندي نصيحة سدّ اوذانك على الفيسبوك وما تقرا لحتى حدّ وابدا بيّ …
