بعض المنشطين والمادين وجوههم ليل ونهار في التلافز ( البعض قلت موش الكل والحمد لله ) يتصوروا اللي الجرأة تعني الهبطان للقاع وتكسير حرف الياجور والاكتفاء بلغة التصريح وليس التلميح في خصوص بعض المواضيع الحارقة والشاغلة..نعم نحن في بلد ديمقراطي ومجتمع منفتح ومن حقنا التعاطي مع مشاكلنا وقضايانا بقصد الاصلاح والبناء وليس بغاية تطييح القدر وقتل الحشمة ولكن ما تنساوش اللي احنا عرب ومسلمين وبرشا حاجات متاع الغير ماتركبش علينا.. وانظروا مثلا لمجتمعات الشرق الأقصى وبلدان حضارات كونفوشيوس والبوذيين مثل الصين..تطور وحداثة وتكنولوجيا وكل شيء ولكن ثمة الحشمة والناس محافظين وما الى ذلك ..راهو الحكاية غالطة والفرنسيس وغيرهم عندهم تقاليدهم وثقافتهم وتعاطيهم الجريء في برامجهم وجرب مثلا قول لفرنساوي البس الجبة ونشط هكذا...وسترى رد الفعل العكسي...راهو الشعوب تنسجم مع تراثها وثقافاتها وهذاكا علاش العرب تلفوا الجرة وضاعوا وفي بالهم اللي الانبتات قفز في التطور..الصحيح الاعتدال والاعتزاز بالجذور مع الأخذ بأسباب الحداثة والمعاصرة والقدر والحشمة و...قدرني ونقدرك..والحياة حلوة بلاش فيشوش وكلوخ وصبعين تلحق الطين..اي نعم...