البارح كلمتني امي في التليفون ...اول مرة من اللي حرقت كلمتني وهي فرحانة وماهياش تبكي ...وقالتلي راني قريب نزغرت ...وسالتها : ان شاء الله خير اميمتي ...قللي اش ثمة ...قالتلي : انا باش نطير من الفرحة على خاطر باش ترجعلي ..وترجع تعيش معايا ...ونشدك ونحضنك ونحطك تحت جناحي ...ونقوى بيك ...ونطير ونجنح ...راك عينيا وضوء بصري ...قلتلها : كيفاش نرجع وانا شفت الموت باش وصلت وين انا توة ...كيفاش اميمتي ...قللي كيفاش ...قالتلي : جاني عمك قبيلة شوية وبشرني اللي هو لقالك خدمة في شركة انتاع سميد ...عمك مسكين اعطى 500 دينار للمدير انتاع شركة باش وافق ...وقالو جيبو يخدم ...نحبك ولدي ترجع فيسع فيسع وماتضيعش ها الفرصة وما طيحش كلمة عمك..سمعتها وتمنيت نبوسها من راسها ...وتمنيت ما نصدمهاش ..وتمنيت ناخو بخاطر عمي ...اما انا حلفت لاعاد نرجع لبلاد مرمدتني من نهار اللي تولدت فيها وياليتني ماتولدت ...قالتلي : كبدي راهي خدمة مسمار في حيط ...اما اشنوة اهوكة كل شهر تعطي من شهريتك 100 دينار لهاك المدير باش مايطردوكش ...وسعت بالي وسمعتها اما مانجمتش نزيد نسمعها وماحبيتش نوجعلها خاطرها فسكتت وقصيت التليفون ...وسبيت والدين الخدمة وجد والدين هاك المدير النذل ...وهزيت عينيا للسماء وقلت ربي يطول في عمرك يااميمتي ولا يشويني فيك ...وربي يسامحني ...