الآن وبعد رفع قرار منع الانتداب هذه خواطر تحمل فكرتين …الاولى شكرا لبعض رجال النادي الذين عملوا المستحيل من اجل تحقيق هدف رفع الانتداب اوّلا والقيام بتعاقدات مع لاعبين جدد في هذا الميركاتو الشتوي …سيذكر لكم التاريخ انجازكم الضخم .. الثانية للبعض المحسوبين على جماهير النادي وهم من فئة النكديين … قداش شككتوا وشلكتوا وسبيتو الهيئة التسييرية ..؟؟.. ايّة وينكم ؟ معناها باش تظهّر روحك محبّ صادق للنادي يلزمك تسبّ وتشكك في عائلتك ؟؟ نفس هذه الفئة توة تشوفوهم يقللو من قيمة الانتدابات ؟؟ تجيبلهم كريم بن زيمة .. يخرجو يقولولك جبتونا شايب في اخر كاريارو ؟ تجيبلهم هالاند يخرجو يقولو ما حاجتناش بهالاند جيبولنا فينيسيوس ؟؟ نتاهلو للبلاي اوف يخرجو يكتبو محسوب هالانجاز العظيم ..فريقنا متاع بطولات موش متاع ترشح للبلاي اوف ..نهزو بطولة ..يخرجو يقولو شوف هاكة الانجاز نحبو على شمبيونزليغ ..ونتصور حتى نهار نهزو شمبيون زليغ يهزّو عينيهم لبطولة العالم للاندية ..ونتصور حتى نهزو بطولة العالم للاندية يقولولنا نحبوا بطولة العالم لكواكب الارض .. مع احترامي … هؤلاء لم ولن يكونوا احباء للنادي ..هذوما وجودهم ما ينجمو يثبتوه كان بمخالفة الاخرين وذلك بالتنبير والتشليك والتقزيم ..هكاكة في نظرهم يلفتوا الانتباه ويوليو ابطال ..ايّ حبّ وسلوك هذا ؟؟ هذا من نوع ومن الحبّ ما قتل … على الجماهير الواعية اني تكون واعية في نقدها والتنبيه الى الاخطاء بصدق ومعقولية وخاصة باحترام و تفهم بانّو ايّ فريق كروي في الدنيا يمرّ بفترات صعبة والجمهور المثالي والواعي هو من يردّد لفريقه وعلى طريقة عشاق ليفربول ايام الازمنة الصعبة YOU LL NEVER WALK ALONE _ لن نتركك تسير وحدك _ الاحباء الحقيقيون هم الذين يؤازرون الغالية في السرّاء والضرّاء …31 جانفي 2023 …
