هاو حوصلة للي فهمتو أنا من كلام رئيس الحكومة: اجتمع سيادته بوزير الصحة ووزير الصناعة وقاللهم دبرو روسكم اتصرفو لازم تح أسبوع خرج وزير الصناعة يجري مشى للوزارة دخل . نادى المكلف بالقماشات قالو اعطيني فيسع نومرو تلفون أي واحد ينجم يخيطلنا ماسكوات . السيد المكلف بالقماشات خرج لبيروه ورجع فيسع جابلو رقم تلفون متاع واحد ما يعرفوش الوزير جملة وهات حوار من وحي الخيال الوزير: ألو عسلامة سي جمال سي جلال . يسلمك أشكون معيا الوزير : معك وزير الصناعة سي جلال : مرحبا بك سيد الوزير الوزير: سي جلال انت تعرف احنا توة في فترة حرب ولازمنا برشا ماسكوات عاد قالولي عندك قماش باش تخيطلنا زوز ملاين ماسك سي جلال : لا نتصور صعيب ياسر سيد الوزير كمية كبيرة برشا الوزير: انا نقلك احنا في حرب وانت تقلي صعيب ياسر ايا ما ثماش حديث برشا سي جلال: باهي نفكر شوية ونرجعلك بعد سويعة تقريبا يرجع سي جلال يكلم السيد الوزير سي جلال : ألو سيد الوزير هاني رجعتلك باش نقلك الي انا موافق اما ماك تعرف تكلفة الماسك وقداش قاعد يتباع في الخارج راهو اكثر من زوز أوروات. ولكن انا نعرف الي هذا باش يتكلف برشا على الدولة متاعنا الوزير : اكيد لا لا برشا لازم تذارينا شوية سي جلال: حاضر سيد الوزير الحاصل بعد أخذ ورد اتفاهمو الزوز على مبلغ كان صدقني ربي 1900 مليم للكعبة الوزير : أيا مبروك عليك الصفقة سي جلال توة برا ابدى خدم هاك الماكينات متاعك وشمر على ذريعاتك المهم تحضرنا الكمية في أسرع وقت سي جلال : حاضر سيد الوزير ما عندك كان الرجال الوطنيين الوزير: الى اللقاء وانشاء في صفقة أخرى انتهت المكالمة ملاحظة: لا الوزير يعرف الي سي جلال نائب في البرلمان ولا سي جلال جاء في بالو الي لازمو يعلم الوزير بذلك . ملاحظة أخرى الصفقة راهي تمت بالتلفون لا ورقة ولا ستيلو( لاش الخسارة) دزها احنا في حالة حرب. لا كراس شروط ولا استشارة حتى بالتلفون أعضاء لجنة الصفقات لا التثبت من نوعية القماش اذا تتوفر فيها المواصفات والا لا . يحسابوه قماش مالطي المهم ما نكسروش كلمة سيد رئيس الحكومة موش مهم احترام الإجراءات الأساسية خاطر هي موش اول مرة تتبرم اتفاقيات بالتلفون ومن غادي الغادي ماهو كانت تصير جينا في الصفقة هذي باش نحيرو. سجل على حالة الحرب والخطر وانده . والي يخالف الكلام هذا "يصطاد في الماء العكر" محاربة الفساد اليوم ماهيش أولوية توة نرجعولها ان شاء الله في حملة انتخابية أخرى اسكت ما تعطلش عمل الحكومة كل تعليق فيه سبان مرفوض